Jamita Minggu Tanggal 29 September 2013

Jamita Minggu Tanggal 29 September 201

Mateus 25:34-40

I.   Patujolo

Pandohan ni Jesus taringot tu “angka na metmet”  i ma angka: na hurangan di saluhut ngoluna (hidup memprihatinkan). Tung godang do masyarakat na so olo marpambahenan tu angka nasida ai dietong ndang apala adong sihirimon sian nasida. Alai di turpuk on  tangkas do didok Tuhan Jesus: “Nasa na binahenmuna tu sada sian anggingKu angka na metmet on, na tu Ahu do i.”  Hinorhon ni kebutuhan siganup ari, ndang adong sipatupaon, toe muse ndang adong na sumarihon nasida, alani I sai mian dibagasan hahansiton ma nasida torus (orang miskin tidak pernah habis, orang sakit tidak pernah hilang, dna).  i do umbahen na gabe marroan nasida tu angka dalan manang tu jabu laho mangido-ido.

II. Hatorangan

Dipabotohon Jesus taringot tu na masa sogot, i ma dung ro Anak ni Jolma i marhasangapon rap dohot saluhut suru-suruanNa, hundulanNa ma habangsa hasangaponNa i. Sirangonna ma saluhut jolma, songon binahen ni parmahan na manirang birubiru boruboru sian birubiru tunggal. Angka boruboru pajongjongonNa tu siamunNa, angka tunggal tu hambirangNa. Didok ma tu angka na di siamunNa: Ro ma hamu, angka na pinasupasu ni Damang, tean hamu ma harajaon i, na pinature di hamu sian haoojak ni tano on.

Didok Yesus tu nasida: Ai na male do Ahu, dilehon hamu do Ahu mangan; na mauas dilehon hamu minum;……. Angka na so boi patupahon tu dirina hombar tu hinaringkot ni ngoluna. Angka na so boi paluahon dohot paturehon dirina, di si ma ro manarihon dohot mangurupi angka na pinapunguNa tu siamunNa i. Asa tung tangkas do nasida marpambahenan tu angka na metmet i, i do na hinalashon roha ni Jesus.

Ndang ditagam angka partigor i na nidok Jesus tu nasida, ai so hea diingot adong dibahen nasida songon i tu Jesus. Sintong do sungkun-sungkun nasida na tu Jesus I : “Nandigan huida hami Ho male….. Ai toho do ndang hea diida nasida Jesus di tingki na binahennasida mangalehon mangan, minum, manjangkon, mamparulosi, maningkir dohot mandulo. Tontu hatiha dibahen nasida pe i, ndang adong Jesus diberengnasida, i do umbahen didok nasida: “Nandigan.”

Jumpang ma hasintonganna sian alus ni Raja i: “Nasa na binahenmuna tu sada sian anggingku na metmet on, na tu Ahu do i dibahen hamu.”  Dibagasan pandohan “anggingku na metmet on,”tontu laos dipataridahon do hatiha i angka na metmet naung di lambung ni Raja i, i ma nasida angka na manjalo pambahenan sian partigor i, rap pungu nasida di siamun ni Raja i di habangsa hasangaponNa i. Angka na metmet i, songon naung pinatolhas di patujolo ima angka na mangolu dibagasan keprihatinan, angka na membutuhkan uluran tangan, kepedulian, dna.

III.          Sipahusorhusoron

Marhite-hite hata ni Tuhan  Jesus di turpuk on,  boi ma botoonta songon dia hita marpambahenan. Ai boi do godang  halak marpambahenan ingkon jolo adong hatorangan tu ise ibana marpambahenan, jala aha ma ringkotna molo marpambahenan. Molo  hita di tingki on ndang boi be dohononta na so taboto, ai nunga tung tangkas ingkon marpambahenan do hape tu angka na metmet, ai na mambahen tu Jesus do hita molo marpambahenan hita tu nasida. Angka na metmet i pe nunga torang dipabotohon, i ma angka na mauas, na male, na buro, na marsangkotbulung, na hansitan dohot na tarhurung. Godang do halak bangkol marpambahenan ala dietong dirina sandiri pe hurangan do. Angka partigor i dang didok angka na mora manang na lobian nasida, ai boi do umparadongan angka na di hambirang i sian nasida, holan na so tubu do rohana laho marpambahenan. Na ias marpambahenan i ma angka na olo mangalehon na di ibana, ndang ala na lobian manang na so ringkot be di ibana. Tapaholang ma nang sian rohanta manguhumi molo adong tabereng donganta bangkol marpambahenan, sandok dirinta ma jolo tahobasi asa hibas marpambahenan tu angka na metmet, dung i pe asa tasosoi donganta, jadi sude ma angka namarpambahenan i sian las ni rohana be, ndang ala ni upa alai gabe dapotan upa na mansai balga. Unang ma ala ni aturan manang mamereng dongan umbahen na olo hita marpambahenan, sandok sian holong ni roha ma ala na manghilalahon asi dohot holong ni roha ni Tuhan i naung dipasahat tu hita, patut ma nang hita manghaholongi angka na metmet.

TATA IBADAH

     IBADAH BONA TAON

                PUNGUAN RAJA SONAK MALELA BORU-BERE/IBEBERE

  KIJANG - BINTAN

   JUMAT, 19 APRIL  2013

I.     IBADAH

1.    Marende Sian BE No. 135: 1 - 2 “  O TONDI PORBADIA”

Marpungu do di joloMon Marsada roha hami on O Jesus Tuhannami
Ho, Raja na tarsilang i, Na pinatimbo i muse Sai ro ma Ho tu hami
Olo, jalo Ma tangiang pamujian di goarMu Ala holong ni rohaMu

Na metmet di mulana i Sai dipararat Ho do i, I ma harajaonMu
Lam ganda do bilangan ni Na paboahon hataMi Baen sangap di goarMu
Jesus tulus Baen sangkapMu; sosoanMu hajolmaon Asa olo paluaon

2.    Votum – Introitus – Tangiang: (U= Uluan;      N= Sude Natorop)

U   :  Marhitehite Goar ni Debata Ama, dohot goar ni AnakNa Tuhan Jesus Kristus, dohot

Tondi Parbadia, na manompa langit dohot tano on. Amen. Mandok mauliate ma hamu

di Jahowa, ai na basa do Ibana, ai ro di salelenglelengna do Asi ni rohaNa i.

N   :  Pujionku ma Jahowa sian nasa rohangku, pajojoronku ma sude halongangan angka

na binahenMu

U   :  Ale Jahowa sigomgom hami. Mansai sangap do goarMu di liat portibi on.

N   :  Marlasniroha jala marolopolop ma ahu mida Ho, endehononku ma goarMu,

ale Natumimbul

U   : endehon hamu ma Jahowa, na marhabangsa di Sion, baritahon hamu ma

angka pambahenanNa tu angka bangso.

N   : Timbul  do Tuhanta I jala pargogo situtu, ndang habilangan parbinotoan-Na i.

U+N: Dihalomohon roha ni Jahowa do tahe angka na manghabiari Ibana, angka

na manghalungunhon asiniroha-Na i.

U   : Martangiang ma hita

Ale Debata Amanami , Debata parasi roha na sumurung mida hami. Mauliate dohot

puji-pujian ma hupasahat hami tu Ho, di bahen asi dohot denggan ni basaM umbahen

boi hami marpungu di inganan on; I ma pomparan ni ompunami Raja Sonakmalela :

boru, bere nang ibebere na adong di luat Kijang on. Huhaporseai hami do, Ho do

na tongtong  mandongani, mangiring dohot manarihon hami di taon naung salpu i.

Ho do namangalehon gogo diganup hami, nang roha na tiur mandalani dohot

mangula ulaon nami di angka ari naung salpu i. Di pargogoi jala dilehon

Ho do habengeton di hami ditingki marungkil asa monang, ditungkoli Ho do

hami diari hagogotan nami.

Ale Tuhan holongMu na manontong i ma sijaloon nami nang di bagasan taon 2013 on. Patiur ma tongtong roha nami jala sungguli hami ale Tuhan laho mangoloi Ho, asa holan Ho huoloi jala husomba hami saleleng ngolu nami. Sai pasada ma rohanami saluhutna angka pinompar ni ompunami raja Sonakmalela na adong di luat on. Asa manongtong hami saroha, sapingkiran, sapanghilalaan, tarlumobi naeng sada roha dohot pambahenannami laho mangoloi Ho marhitehite punguannami on. Sai tangihon ma tangiangnami on ale Tuhan, marhitehite goar ni anakMu Tuhan Jesus Kristus Tuhannami.

P+J          : Amen

3.       Marende No. 172 : 2-3 “O JESUS PANONDANG”

Sesa ma dosangku Ale Tuhanki
Ala ni mudarMu Na nilehonMi
Asal ma rohangku Salelengna i
Ingot di hansitMu Dohot mudarMi

Tondi,daging,roha Nang gogona i
Unang tu na roa Sai di Ho ma i
Ingkon gok di Ho ma Au hinophopMon
Asa saut martua Au siseanMon

4.   TANGIANG MANOPOTI DOSA      ( U=Uluan;  H=Hulahula;  Bo=Boru;  Be=Bere/Ibebere)

U     :  Ale Tuhan Debata, Marpungu do hami nuaeng Pomparan ni Raja Sonak Malela, boru, bere nang ibebere na maringan di luat Kijang-Bintan on. Marlasniroha do hami, di na tolhas hami sahat tu taon 2013 on. Hupatupa hami do pesta bona taon songon tanda ni lasnirohanami, songon I nang tanda ni hamauliateonnami tu Ho. Alai Tuhan, nang pe marlasniroha hami, hurajumi hami do paboa jolma pardosa do hami. Ima marhite angka hata, pambahenan, nang angka ruhut-ruhut ni partuturon nami di punguan on. Hujou hami do goarMu na badia i, ala na targogot situtu hami di dosanami i. Sai marasi ni roha ma Ho mida hami on.  

H     :  O Tuhan Jesus Anak ni Debata na gabe jolma ala ni hami . Ndang tagamon so adong hahurangan nami angka hula-hula, angka na marhamaranggi, maradophon angka na mardongan tubu, maradophon angka boru, songon I maradophon angka bere nang ibeberenami. Sipata olo do sogo roha ni dongan hubahen hami, sipata olo do bingkas roha ni angka boru, bere dohot ibeberenami hubahen hami. Saluhutna I olo do tubu sian rohanami sandiri nang na so hu tuntun hami. Asi ma rohaM di hami, sesa ma dosanami, jala paimbaru ma hami

Bo   : O Tuhan Jesus Anak ni Debata! Ho do Ulu ni saluhut na porsea, ruasMu do hami. Ho do hangoluan dohot hasonangannami. Sipata olo do lupa hami laho pasangaphon angka hula-hula nami, songon I maradophon angka dongan paribannami. Olo do dang huboto hami manjagahon parhundul nang panghataionnami. Alani I Tuhan, di tingki on, di saluhut angka hahurangannami, sai sesa ma I, paimbaru ma hami nang parsaorannami.

 

Be         : Nang di hami pe horong ni bere dohot ibebere ale Tuhan. Tangkas do hurajumi hami angka hahurangannami maradophon angka natuatuanami, tulangnami nang angka pariban, suang songoni nang parsaoran sama hami; di angka siulaon, di angka parpunguan nang parsaoran siganup ari. Sai taiti ma rohanami tu Ho, urupi ma hami jala patongtong mangalo dosanami.

SUDE PUNGUAN : Paias ma rohanami be, parangenami baen ture nang panghataionnami. Tompa ma roha na imbaru di hami asa haru monang hami maralohon nasa dosanami.

U             : Hamuna angka dongan na hinaholongan! Tajangkon jala tahangoluhon ma bagabaga ni Debata taringot tu hasesaan ni dosanta: “Songon on do Hata ni Tuhan Jahowa: Nunga di arsahi ho Ahu marhite sian angka dosam, jala nunga dilojai ho Ahu marhite sian angka hajahatonmu. Ahu tutu, Ahu sandiri manalesei angka pangalaosim ala hadirionKu, jala ndang be Hupaingotingot angka dosam”. Hasangapon ma di Debata na di ginjang.

U+N        :   Amen               

4. MARENDE SIAN BE. NO. 123: 3-4  “ALE DONGAN NA SAROHA”

Sai pasada ale Tuhan Angka na porsea i
Asa masihaholongan Songon na pinatikMi
Dibagasan hasintongan I do pinangidoMi
Sai padomu angka dongan Na tutu sinondangMi

Sai pasada rohanami Doshon Ho tu Ama i
Asa unang sian hami Nanggo sada lilu be
Ho tongtong hutiru hami Di ulaon i sude
I ma patandahaon hami Gabe siseanMu be

5. J A M I T A

6. MARENDE SIAN BE.  519: 3 “ TARBEGE DO PANJOU”

Antong ringgas ma lao mamboan, barita ni Tuhanta i

Tu angka marga di na holom, asa dapotan dohot i

Reff: Hita sude, naeng ma rade, nang di lele da

Haposan ma di Debata

7.   TANGIANG PANGONDIANON

8.   MARENDE SIAN BE. 119: 1---- “MARTUA DO DOHONON” (Pelean)

Martua do dohonon Na marsaama i
Na tong marparrohaon Maniop dame i
Na tong marparrohaon Maniop dame i

 

  Sumorop anggo ombun Pabornok ladang i
  :,: Laos songgop hatuaon Tu angka dongan I  (2 X)

                        ------ musik-----

Dung i sumuang sogot Ma hasonangan i
:,: Malua naung tarihot Ias pardosa I   (2X)

Sudena na porsea Na masuk do tusi
:,: Na gabe sahuria Na marsaraja I  (2 X)

10.   PANUTUP

U       : Mandok mauliate ma hita tu Debata, ala denggan ni basaNa dohot asi ni rohaNa na so halompoan i mangaramoti ngolunta. Mansai balga situtu do holong ni roha ni Tuhanta mangaramoti hita Punguan Raja SONAKMALELA, boru, bere, Ibebere na adong di  Kijang-Bintan on, sian taon naung salpu sahat tu taon 2013 on.

H       : Dihita saluhutna, nunga di paloas Debata hita masuk tu taon 2013 on. Silehon-lehon ni Debata do on tu hita, sihamauliatehononta. Alai ingkon pangkeonta do taon na binasabasahon ni Tuhan i dibagasan hasatiaon tu Ibana marhite ngolu nang pambahenanta.

Bo     : Jahowa do silehon tua dohot pasupasu tu hita, Ibana do hatuaonta. Soara    ni olopolop dohot hatuaon marsaringar di undung-undung ni angka partigor: Siamun ni Jahowa do sibahen hamonangan dohot las ni roha di hita.

Be     : Sai jagahon dirim asa unang dihalupahon roham Jahowa naung manogihon ho ruar sian taon 2012 masuk tu taon 2013 on.

U       :Diingot Jahowa do hita: Ibana ma tutu mamasumasu ngolunta. Ibana do mamasumasu nang sude pinompar ni raja Sonak Malela, boru, bere, Ibebere na di ranto nang di Bona Pasogit pe; martua ma hita jala sonang. Alai tutu, manat ma hamu mamereng, manangkasi parulaonmuna songon angka na marroha, unang ma songon angka na hurang roha

PUNGUAN : Saluhutma hita umboto laho mamparhaseang tingki tu ulaon na denggan, ai ari hasusaan do nuaeng. Ta antusi ma, manang dia lomoniroha ni Tuhan i.

U       : Ingot ma hita di poda ni ompunta raja Sonak Malela : Sisada lulu anak, sisada lulu boru. Anak na so jadi masibola-bolaan, boru na so jadi masitindian. Alani i Masioloan ma hamu sian biar ni rohamuna mida Kristus. Amen, Rap mandok ma hita di tangiang hatopanta I :  Ale Amanami na di banuaginjang……..

 

    13. PASUPASU

         

                     II. ACARA NA MANGIHUT